Laylatul Qadrni qanday kutib olish kerak?

Ramazon oyining eng ulug‘ va muborak kechalaridan biri – Laylatul Qadrdir. Bu kecha Alloh taolo tomonidan ulug‘langan, fazilati ming oydan ham afzal bo‘lgan buyuk kechadir. Mo‘min banda bu kechani g‘animat bilib, ibodat va duo bilan o‘tkazishga harakat qiladi.
Laylatul Qadrning ulug‘ligi
Alloh taolo Qur’oni karimda shunday marhamat qiladi:
إِنَّا أَنْزَلْنَاهُ فِي لَيْلَةِ الْقَدْرِ
وَمَا أَدْرَاكَ مَا لَيْلَةُ الْقَدْرِ
لَيْلَةُ الْقَدْرِ خَيْرٌ مِنْ أَلْفِ شَهْرٍ
تَنَزَّلُ الْمَلَائِكَةُ وَالرُّوحُ فِيهَا بِإِذْنِ رَبِّهِمْ مِنْ كُلِّ أَمْرٍ
سَلَامٌ هِيَ حَتَّىٰ مَطْلَعِ الْفَجْرِ

“Albatta, Biz uni (Qur’onni) Qadr kechasida nozil qildik.
Qadr kechasi nima ekanini qayerdan bilarding?
Qadr kechasi ming oydan yaxshiroqdir.
U kechada farishtalar va Ruh (Jabroil) Parvardigorlarining izni bilan har bir ish uchun tushadilar.
U kecha to tong otguncha tinchlikdir.”
Bu oyatlar Laylatul Qadrning naqadar buyuk ne’mat ekanini ko‘rsatadi.

Laylatul Qadr qachon bo‘ladi?
Payg‘ambarimiz ﷺ bu kechani Ramazonning oxirgi o‘n kunligidagi toq kechalardan izlashni buyurganlar:
تَحَرَّوْا لَيْلَةَ الْقَدْرِ فِي الْوِتْرِ مِنَ الْعَشْرِ الْأَوَاخِرِ مِنْ رَمَضَانَ
“Laylatul Qadrni Ramazonning oxirgi o‘n kunligidagi toq kechalardan izlanglar.”
Ya’ni 21, 23, 25, 27 yoki 29-kechalarda bo‘lishi mumkin.

Rasululloh ﷺ bu kechani qanday o‘tkazganlar?
Ummul mo‘minin Oisha roziyallohu anho rivoyat qiladilar:
كَانَ رَسُولُ اللَّهِ ﷺ إِذَا دَخَلَ الْعَشْرُ الْأَوَاخِرُ أَحْيَا اللَّيْلَ، وَأَيْقَظَ أَهْلَهُ، وَشَدَّ مِئْزَرَهُ
“Ramazonning oxirgi o‘n kunligi kirganda Rasululloh ﷺ kechani ibodat bilan o‘tkazar, oilalarini ham uyg‘otar va ibodatga yanada ko‘proq kirishar edilar.”
Bu hadis mo‘minlarga Laylatul Qadrni g‘animat bilib, ibodatni ko‘paytirishni o‘rgatadi.

Laylatul Qadrda qanday ibodatlar qilish kerak?
Bu muborak kechada quyidagi ibodatlarni ko‘paytirish tavsiya qilinadi:
Qur’on tilovati,
Nafl namozlar (tahajjud),
Ko‘p duo qilish,
Istig‘for aytish,
Zikr va tasbehlar,

Laylatul Qadr duosi
Oisha roziyallohu anho Rasululloh ﷺ dan so‘raganlar:
“Agar Laylatul Qadrni topsam, qanday duo qilay?”
Shunda u zot shunday deganlar:
اللَّهُمَّ إِنَّكَ عَفُوٌّ تُحِبُّ الْعَفْوَ فَاعْفُ عَنِّي
“Ey Alloh! Sen kechiruvchisan, kechirishni yaxshi ko‘rasan, meni ham kechirgin.”
Bu duo Laylatul Qadrda eng ko‘p o‘qiladigan duolardan biridir hisoblanadi.
Xulosa
Laylatul Qadr – bu hayotda kamdan-kam uchraydigan ulkan imkoniyatdir. Chunki bir kechada qilgan ibodat ming oydan ham afzal bo‘ladi. Shuning uchun mo‘min banda bu kechani g‘animat bilib, ibodat, tavba va duoga sho‘ng‘ishi kerak.
Alloh taolo barchamizga Laylatul Qadrni topishni va undagi ibodatlarni qabul qilishni nasib etsin.
اللهم بلغنا ليلة القدر وارزقنا فيها القبول والمغفرة.

Ta’lim muassasasi Tafsir fani mudarrisi Akramxon domla Suyarov