УЛУҒЛАРИМИЗ ҲАЁТЛАРИДАН….

Пайғамбаримиз алайҳиссалом бир муборак ҳадисларида айтадилар: “Агар Аллоҳга ҳақиқатан таваккул қилсангиз, У эрта билан оч чиқиб, кечқурун тўқ қайтган қушларни ризқлантиргани каби сизларни ҳам ризқлантиради”.

Шақиқ Балхий ҳазратлари ибодат ва итоатда беназир зот эдилар. Бир куни у зот чўлда қаноти синиб уча олмаётган бир қушни кўриб қолди. Хаёлига, бу қуш учолмаса, ов қилолмаса, қандай қилиб жон сақлаяпди, деган гап келди. Олим бир панароқ жойга ўтиб қушни кузата бошлади. Бир пайт чигиртка тутиб олган бошқа қуш учиб келдида ногирон қушнинг оғзига солиб қўйди. Шунда Шақиқ Балхий ҳазратлари бир қаноти синган қушни таъминлаган Аллоҳ мени ҳам таъминлагай, деди-да шу кундан бошлаб ҳамма ишларини йиғиштириб қўйди. Бу ёғи Аллоҳга таваккал дея кечаю кундуз ибодатга шўнғиди.

Шақиқ Балхий ҳазратларининг бу тадбирини эшитган Иброҳим Адҳам уни ҳузурига чорлади.

— Нега сен тирикчилигингни йиғиштириб қўйдинг?

— Ахир бир ногирон қушнинг ризқини бериб турган зот мени ҳам таъминлашга шубҳа қилайми?-деди Шақиқ Балхий ҳазратлари ва бўлган воқеани айтиб берди.

Унинг гапини эшитган Иброҳим Адҳам:

— Унда айтчи, нега сен ўша ногирон қушни таъминлаётган соғлом қуш бўлмайсан? Ахир шарафга ҳарпакат қилувчи қуш кўпроқ муносибку. Расулуллоҳ соллаллоҳу алайҳи ва саллам: “Берган қўл олган қўлдан хайрлироқдир” деганларини эшитмаганмисан?- дедилар.

Иброҳим Адҳамнинг бу сўзларини эшитган Шақиқ Балхий янглиш йўлда юрганларини англадилар ва бў йўлдан қайтдилар.

Интернет маълумотлари асосида тайёрланди

Билим юрти 4-босқич 77-гуруҳ талабаси Яркулов Иноятуллоҳ