Яхшиликлар онаси

Яхшиликлар онаси

Яхшиликлар онаси

Сиз азизларга бугун тақдим этмоқчи бўлган мақолам қанча эътироф этилса ҳам оз ҳисобланадиган, энг олий хислатлардан бири “Ота-онага яхшилик қилиш фазилати” мавзусидир. Дарҳақиқат, бу фазилат эскирмайдиган, мутолаа қилувчини ҳеч малоллантирмайдиган мавзулардандир.

Ҳақиқатда яхшилик қилишга энг лойиқ инсонлар бу  шубҳасиз ота- оналардир.

Бу улуғ хислат ҳақида қанчадан-қанча Қуръон оятлари, ҳадиси шарифлар ҳам ворид бўлган.

Аллоҳ таоло Қуръони Каримнинг бир неча ўринларида ота-онага яхшилик қилиш ва уларга итоат этишни Ўзига ибодат қилишдан кейинги ўринга қўйган.

Жумладан, “Нисо” сурасининг 36-оятида Аллоҳ таоло шундай марҳамат қилади:

وَاعْبُدُوا اللَّهَ وَلاَ تُشْرِكُوا بِهِ شَيْئًا وَبِالْوَالِدَيْنِ إِحْسَانًا

Яъни: “Ва Аллоҳга ибодат қилинглар ва Унга ҳеч нарсани ширк келтирманглар. Ота-онага яхшилик қилинглар”.

Муфассир уламолардан имом Совий раҳматуллоҳи алайҳ бу оятнинг тафсирида: “Аллоҳ таолога ибодат қилиш ёнида ота-онага яхшилик қилишни зикр этилишида уларнинг ҳақларини таъкидлаш ва оқ бўлишдан огоҳлантириш маънолари бор” дейдилар.

Ҳадиси шарифда эса қуйидагилар марҳамат қилинган:

عَنْ عَبْدِ اللهِ بْنِ عَمْرٍو، قَالَ: قَالَ رَسُولُ اللهِ صَلَّى اللَّهُ عَلَيْهِ وَسَلَّمَ: «رِضَا اللهِ فِي رِضَا الْوَالِدَيْنِ، وَسَخَطُ اللهِ فِي سَخَطِ الْوَالِدَيْنِ» رَوَاهُ التِّرْمِذِيُّ.

Абдуллоҳ ибн Умар розияллоҳу анҳудан ривоят қилинади:

“Расуллуллоҳ соллаллоҳу алайҳи ва саллам: “Аллоҳнинг розилиги ота-она розилигида, Аллоҳнинг ғазаби ота-онанинг ғазабидадир”, дедилар”.

Термизий ривоят қилган.

Пайғамбаримиз соллаллоҳу алайҳи ва саллам ушбу насиҳатлари орқали фарзанд ўз ота-онасига доимо яхшилик қилиб бориши кераклигини уқтириш баробарида уларнинг ғазабига сабаб бўладиган ишлардан ҳам қайтармоқдалар.

Шундай экан, ҳар биримиз ота-оналаримизга яхшилик қилиб, уларнинг дуоларини олиб, хизматларига саъй-ҳаракат қилмоғимиз керак. Уларга озор етказадиган, қалбларини оғритадиган ишлардан сақланишимиз даркор.  Зеро, тарихдан маълумки, Пайғамбарга қўшни қилган ҳам ва аксинча, бир обиднинг юзини қаро қилган ҳам ота-онанинг дуоси бўлган.

“Саййид Муҳйиддин махдум”

ўрта махсус ислом билим юрти

3-босқич талабаси Абдуллоҳ КОМИЛОВ