БОЛАНИНГ ҚУЛОҒИГА АЗОН ВА ТАКБИР АЙТИШ

Абу Рофеъ розияллоҳу анҳудан ривоят қилинади.

“Расулуллоҳ саллоллоҳу алайҳи васалламнинг Фотима розияллоҳу анҳумонинг туққан боласи Ҳасан ибн Алининг қулоғига намознинг азонини айтаётганларини кўрдим”.

Абу Довуд ва Термизий ривоят қилишган.

Ушбу ҳадиси шарифга биноан, янги туғилган фарзанднинг ўнг қулоғига азон, чап қулоғига  иқома айтмоқ мандубдир. Аллоҳнинг зикри янги туғилган боланинг қулоғига кирган биринчи нарса бўлиши қандай ҳам яхши. Албатта, бу улуғ нарсанинг ўзига яраша баракаси бўлади.

Ҳусайндан ривоят қилинади:

“Расулуллоҳ Расулуллоҳ саллоллоҳу алайҳи васаллам: “Кимнинг боласи туғилса-ю, унинг ўнг қулоғига азон, чап қулоғига иқома айтса, унга Умму Сибён зарар етказа олмас”, — дедилар.

Абу Яъло ривоят қилган.

“Умму Сибён” болаларга зиён етказадиган жин тоифасидир.

Андижон “Саййид Муҳйиддин махдум”

ўрта махсус ислом билим юрти мударриси

Муслимбек ЙЎЛЧИБОЕВ