Жойнамоз

Дунё дил суғорди – мен сўлдим,
Хомхаёл туғилди – мен ўлдим,
Аллоҳга қул бўлдим – шоҳ бўлдим,
Сен улуғ тахтимсан, жойнамоз.

Эшиксан сабрга, тоқатга,
Элтаринг охири роҳатга,
Боғлайсан кўнгилни тоатга,
Бир буюк аҳдимсан, жойнамоз.

Саҳарлар, кечалар “Кечир!”лаб,
“Гуноҳ кўп, уларни ўчир!”лаб,
Шайтонни кар қилдим пичирлаб,
Шиддатим, шаҳдимсан, жойнамоз.

Сакинат ичраман қоимда,
Учарман ўтирган жойимда,
Пешонам силайсан пойимда,
Беминнат бахтимсан, жойнамоз.

Содиқ дўст бўлолсам умрбод,
Ҳақингни тўлолсам умрбод,
Сен узра йўл олсам умрбод,
Жаннати нақдимсан, жойнамоз!

Билим юрти мударриси Ўткирбек
Мадумаровнинг “Бу сенинг ёдинг”
шеърий тўпламлар китобидан