Нега ёлғон сўзлайсан, айтчи?

Тушунмайман, ҳолингга, оғам,
Ташинг бошқа, бошқа ичинг ҳам,
Юрагингда ўтрикларми жам,
Нега ёлғон сўзлайсан, айтчи?

Алдов нима – қинғирдан учқун,
Чиқиб қолар қийиғи бир кун,
Қинғирликни бошладинг нечун?
Нега ёлғон сўзлайсан, айтчи?

Гапларингда гўё ғубор йўқ,
Ишонмасак, урадирсан дўқ,
Кўзларингни қилганингча лўқ,
Нега ёлғон сўзлайсан, айтчи?

Сув ичгандек ичасан қасам,
Ёрилмайсан, мундоқ қарасам,
Қўрқадирман эртанг ўйласам,
Нега ёлғон сўзлайсан, айтчи?

Тилинг билан берурсан азоб,
Ютдим дейсан, йўқ ҳолинг хароб,
Номинг атар халойиқ каззоб,
Нега ёлғон сўзлайсан, айтчи?

Ёлғон гуноҳ , катта бир гуноҳ,
Гуноҳингга тилларинг гувоҳ,
Банда билмас, биладир Аллоҳ,
Нега ёлғон сўзлайсан, айтчи?

Умматиммас ёлғончи ундай,
Росулуллоҳ десалар шундай,
Ўйлаб кўр-чи, бу гапни, ҳай-ҳай,
Нега ёлғон сўзлайсан, айтчи?

Билим юрти мударриси Ўткирбек
Мадумаровнинг “Бу сенинг ёдинг”
шеърий тўпламлар китобидан