Ramazon tugadi bandalik tugamadi…

Ramazon oyi tugadi. Masjidlar, saharlik va iftorlar, taroveh namozlaridagi go‘zal lahzalar ortda qoldi. Ammo bandalik tugamadi. Chunki Ramazondagi Robbimiz – boshqa oylarning ham Robbisidir. Mo‘min uchun ibodat faqat bir oy bilan cheklanmaydi, balki butun umr davom etadigan yo‘ldir.
Alloh taolo Qur’onda shunday marhamat qiladi:
وَاعْبُدْ رَبَّكَ حَتَّىٰ يَأْتِيَكَ الْيَقِينُ
“Senga aniq narsa (ya’ni o‘lim) kelgunicha Robbingga ibodat qil.”
(Hijr surasi, 99-oyat)
Bu oyat mo‘minning ibodati faqat Ramazon bilan tugamasligini, balki umrining oxirigacha davom etishini eslatadi.
Ramazondagi Robbimiz – har doim Robbimiz.
Ramazonda harom bo‘lgan ishlar boshqa oyda ham haromdir.
Ramazonda qilgan savobli amallar boshqa oyda ham savobdir.
Ramazonda o‘qilgan Qur’on boshqa oyda ham eng ulug‘ Kitobdir.
Ramazonda qilgan zikrlarimiz boshqa oyda ham qalbni poklaydi.
Shuning uchun haqiqiy mo‘min Ramazon tugashi bilan ibodatni tark etmaydi. Aksincha, Ramazon uni yangi hayotga o‘rgatgan maktab bo‘ladi.
Amallar davomiyligi haqida hadis
Rasululloh ﷺ shunday deganlar:
أَحَبُّ الأَعْمَالِ إِلَى اللَّهِ أَدْوَمُهَا وَإِنْ قَلَّ
“Allohga eng sevimli amal – oz bo‘lsa ham davomli bo‘lgan amaldir.”
Demak, Ramazonda boshlagan ibodatlarimizni oz bo‘lsa ham davom ettirish – Allohga eng sevimli ishlardan biridir.
Ramazondan keyin qanday davom etamiz?
Ramazondan keyin mo‘min quyidagi amallarni davom ettirishga harakat qiladi:
Besh vaqt namozni masjidda yoki vaqtida ado etish
Qur’on tilovatini tark qilmaslik
Zikr va istig‘forni ko‘paytirish
Nafl ro‘zalarni tutish (masalan, Shavvol oyidagi olti kun)
Sadaqa va yaxshilikni davom ettirish
Shunda Ramazon biz uchun faqat o‘tib ketgan oy emas, balki butun yilimizni o‘zgartirgan maktab bo‘ladi.
Xulosa
Ramazon tugadi, lekin biz hamon mo‘minmiz, musulmonmiz. Bizning yo‘limiz – Allohga ibodat qilish yo‘li. Bu yo‘l esa faqat bir oy bilan tugamaydi.
Shuning uchun har bir mo‘min qalbidan shunday duo chiqadi:
Ey Alloh! Bizlarni O‘zingga yo‘liqadigan kunimizgacha iymonda, ibodatda va toat-ibodatda sobitqadam qil. Ta’lim muassasasi Tafsir fani mudarrisi Akramxon domla Suyarov