Sabr va rozilikning barakasi

Inson hayotida sabr va qanoat eng ulug‘ ne’matlardan sanaladi. Ular qalbga xotirjamlik, hayotga esa baraka olib kiradi. Quyidagi hikoya ham aynan shu haqiqatni yorqin ifodalaydi.

Qadim zamonlarda Bani Isroil qavmida juda taqvodor va ibodatga berilgan bir kishi yashar edi. Bir kuni u xotiniga:

—   Anchadan beri qo‘y go‘shtini yegim kelmoqda, — dedi. Shunda ayoli:

—     Mayli, men o‘nta qo‘y so‘yaman: bittasini siz uchun, qolgan to‘qqiztasini esa kambag‘allarga sadaqa qilaman, — deb javob berdi.

Ayol aytganidek ish tutdi. Ammo ularning kichik o‘g‘li onasining qo‘ylarni qanday so‘yayotganini ko‘rishni istadi. Qo‘rqqanidan qochib borib, bir tandirga tushib ketdi va halok bo‘ldi. Bu og‘ir musibatga qaramay, ayol farzandi bilan mashg‘ul bo‘lib qolmadi, balki kambag‘allarga yordam berishda davom etdi.

Kechga yaqin eri uyga qaytib keldi. Taomlanib bo‘lgach, ayoli undan so‘radi:

—   Agar biror kishi sizga omonat bersa, keyin uni qaytarib olsa, bunga nima deysiz? Er javob berdi:

—   Albatta, omonat egasining haqqi bor. U istagan paytda o‘z omonatini qaytarib olishi mumkin.

Shunda ayol dedi:

—     Unday bo‘lsa, sabr qiling. Alloh bizga omonat qilib bergan farzandimizni o‘z huzuriga qaytarib oldi. O‘g‘limiz vafot etdi.

Bu xabarni eshitgan ota chuqur iztirob chekdi. Biroq ayolning hikmati va iymoni unga kuch berdi. Ular taqdirga rozi bo‘lib, sabr bilan bu sinovni qarshi oldilar.

So‘ng ayol eriga:

—   Keling, yana bir narsani ko‘raylik, — dedi.

Ular ertalab tandir oldiga bordilar. Tandirning og‘zini ochib qarashsa, mo‘jizaviy tarzda o‘g‘illari sog‘-salomat o‘tirgan, kulib turardi.Shunda ular Allohning cheksiz qudrati va rahmatini yanada chuqurroq his etdilar. Bu voqea ularga sabr va rozilikning naqadar buyuk baraka ekanini yana bir bor namoyon etdi.

Xulosa, hayotda har bir inson turli sinovlarga duch keladi. Musibat kelgan paytda shikoyat qilish oson, ammo sabr qilish va Allohning taqdiriga rozi bo‘lish haqiqiy mo‘minning fazilatidir. Sabr insonni mustahkam qiladi, rozilik esa qalbga taskin beradi. Ana shunday insonlar oxir-oqibat Allohning rahmati va barakasiga sazovor bo‘ladilar.

Ta’lim muassasi 2-kurs

talabasi Abduvosiyev Adhamjon tayyorladi