Сен мендандирсан – Али (р.а.)нинг юксак мақоми

#SahobalarHayoti

Ислом тарихида шундай зотлар борки, уларнинг иймони, жасорати ва фидойилиги уммат учун абадий ибрат бўлиб қолади. Уларнинг энг намоён ва улуғларидан бири — Ҳазрати Али ибн Абу Толиб (розияллоҳу анҳу)дир. У зот Расулуллоҳ соллаллоҳу алайҳи васалламнинг яқин қариндошлари, куёви ва энг ишончли сафдошларидан эдилар.

Набий соллаллоҳу алайҳи васаллам Ҳазрати Али розияллоҳу анҳуга шундай деганлар:
«Сен мендандирсан, мен сендандирман».

Умар розияллоҳу анҳу эса бундай деганлар:
«Расулуллоҳ соллаллоҳу алайҳи васаллам ундан рози бўлиб вафот этдилар».

Бу сўзлар Ҳазрати Алининг Расулуллоҳ соллаллоҳу алайҳи васаллам наздидаги юксак мақомларидан далолат беради.

Салама розияллоҳу анҳудан ривоят қилинади:

«Ҳазрати Али (р.а.) Хайбар жангидан аввал Набий соллаллоҳу алайҳи васалламдан ортда қолган эдилар, чунки кўзлари оғриётган эди. Кейин у киши шундай дедилар:
«Расулуллоҳ соллаллоҳу алайҳи васалламдан ортда қоламанми?»
Кейин чиқиб кетдилар ва Набий соллаллоҳу алайҳи васалламга етиб олдилар.

Эртаси куни Расулуллоҳ соллаллоҳу алайҳи васаллам дедилар:
«Эртага байроқни Аллоҳ ва Расулини яхши кўрадиган ва Аллоҳ ва Расули ҳам уни яхши кўрадиган кишига бераман. Аллоҳ унга фатҳ бергудир».

Қарасак, Ҳазрати Али розияллоҳу анҳу келдилар. Биз ундан бунчалик фатҳ кутиб ҳам тўғри келтирмаган эдик.

Байроқ у кишига берилди ва Аллоҳ таоло у зот орқали Хайбарни фатҳ қилдирди.

Ҳазрати Али розияллоҳу анҳу – иймон, вафо, жасорат ва илмда тенгсиз зот эдилар. Расулуллоҳ соллаллоҳу алайҳи васаллам унинг ҳақида шундай улуғ мақтов сўзлар айтганларки, бу унинг Исломдаги ўрни ва шарафини очиқ кўрсатади.

Биз у зотни яхши кўрамиз ва уларнинг фазилатларидан ибрат оламиз. Аллоҳ таоло бизни ҳам у зотга ўхшаган содиқ, вафодор ва жасур бандаларидан қилсин.

Ta’lim muassasasi mudiri Rustamjon domla Mahmudov